SONGKO

Zougam saangthing maang la a
Phaimit pellou Songko phung
Na nel jem nei tam haime
Na din na mun jaang haime
Khal huilhi ahung nun teng
Lhang dung lamvai vei le in
Iti nahai tan temo?

Pon nem hilou na pheiphung
Selnge louvin maha dong
Hemhei lingna na vonchoi
Zainem tongdon na tongkoi
Na selung lai chaam ding chun
Na angkoi ding lhangai chun
Iti chol pong tin temo ?

Chung lengva ten nabome
Napah hoilai lhasuo mon
Zaila oiyin nakim vel
Phesun ling in tomnan jong
Laigil nun nem haideh lou
Somai lhaisel hih nante
Selung lai vang amuolpoi

PHUOLVA

Phuolva nangma galeng inlang
Ngainu somai lhainam gaven
Laitol noma lenga hinam
Golcheng toh kipah a nuinam
Noma hinkho aman le
Ngai samang jal khatvei hinven
Hin po maitan lungset somai

Ngainu melso namu teng
Nguijin jena aumle
Apang dalha lou jenin
Lungset somai ngui hio heo
Lonlhi lonsah lou jenin
Hin lhem lungmong kit inlang
Hin kipasah kit tei in

Phuolva nangman hinven lang
Ngainun guoldang asai tam
Laidang thimthu alel le
Phuolva hung kile mai tan
Guolkom nahung kit tengle
Ngainu samjang khat hinpon
Lungset mela mu dingin

Ngainun eina hetjingle
Lungset thimthu lel kit in
Ngainu bei in guol lungsung
Muong jou louvin akapme
Ngainun eina san kit le
Hinkho'n kipasah inge
Phuolva hinsei themin o

GOMAL [RAINDROPS]

Nichang sat sot thoh gim petna
Vana kon gotui dap ahung lhah teng
Gam huilhi vot nemin ahin juiyin
Haai cheng lunglai olna apeji

                Gotui a mal malin achu e
                Chotna leiset hinna tha apei
                Gotui a mal mala alhah teng
                Vangbohna hunglha hilou ding ham ?

Tantih neilou chunga thonggo
Dalna kot kihong bang ajuh teng
Muphah muncheng tuivei in chupmin
Haai cheng kaa aw akijai

               Gotui mal khou tah tah in ajui
               Akang thei lou dontui nah bang
               Atuh ding khut umlou abah teng
               Lungsatna hunglha hikhan tem?

Nisat phad jong uminte
Gojut ni jong uminte
Gomal khou tah tah alhah hi
Setlei khohei hilou ding ham ?
Leiset Chung Mang khutsoh ahile
Chung Mang thilgon himai tante
 

RE-UNION IN DELHI

BRAHMAPUTRA

Na mange tui luong zalaiya
Agaal muphah haime! Atuol maiphah haime!
Limnga tincheng abuol nalima
Na pang lhunga najemhoi doncha eng jin jen
Na vuisa noilei hui le det tui
Nasuon chate lhasam talouve

Nahung kumlhai sanga kon
Tsangpo nahi Tibetna! Chin gam huitheng na donpai!
Phaigam muman Lohit natiuve
Tuiluong chengin nadip na lamlhung
Noi Bangla miten Padma tijong leo
Ngaicheng in vang Luit min ngei napeove

Nakuo bang cheng nalhupme
Nasou thamding koi haime! Nalhembi ding koi haime!
Jalna buhcheng nakim vel
Lholou phaimin naselmang
Ngaicheng ka aw athonge
Nungsun loujen na tuoi cheng

Namil hitam na lungsat
Naluong inei cham delin! Nahai tan nem nemheo chan!
Kikhaang dil del luong thing nachunga
Toni'n lhumlam sanga kon
Nguijin jena nasal teng
Sana tuidung na emsel

 

PANPI NGAICHA TEHSE (NEEDY OLD WOWAN)

Ana kipha matnin ne
Kailhang kenglam chung dona
Ajah doh e abaan ni'n
Pon pa dil del hung kai lhaan
Chesuh chetou maisuo ven
Angah geove selhah khum

Vetngam haime amelso
Melmu maito thakhat in
Ima gelman hilouve
Phah le pelpai hetman lou
Tongdon manlou kahitam?
Nungin lunga alang jing

Paai khat paai ni to jeh a
Ning lhing chomdeh ding haime?
Dangka bih kham lou sanga
Ngailudna jen phajon tem?
Dan lou ati kitnun ne !
Kiel in manmo aneipoi

Singsung chatmo don louvin
Kholai mipha in kithang
Amin seinom sei tante
Nunghei san kit talouve
Khutdo tehse tiponge
Panpi ngaicha ka laijon